DÍA DE ROSALÍA. DÍA INTERNACIONAL DA MULLER.

A Biblioteca e mais o Equipo de Dinamización da Lingua (EDLG) quixemos celebrar da man estes dous días tan sinalados. Coa Rosalía como luceiro guía, quixemos simbolizar todas esas autoras “invisibles” que temos nos andeis. Foi un acto sinxelo mais necesario.

En primeiro lugar leuse o MANIFESTO DA ASOCIACIÓN ESCRITORES ESCRITORAS EN LINGUA GALEGA (AELG). “ERRANTES POLO MUNDO ANDAMOS”, logo un vídeo para coñecermos algo máis a vida de Rosalía, logo CINCO COUSAS QUE QUIZAIS NON SABIADES DE ROSALÍA  e fixádevos se a nosa autora é importante que ATA XA HAI UNHA ESTRELA CO SEU NOME. Como sabemos que hoxe en día o nome de Rosalía vos trae á mente outra muller, amosámovos o traballo que sobre o poema rosaliano “Castellanos de Castilla” e a canción “Malamente” fixo o alumnado do CPI As Mirandasde Ares.

Rosalía sempre reivindicou a igualdade entre os xéneros. Pois ben, igualdade, esa é a temática central da celebración do 8M deste ano.

Escoitastes atentamente  AS PALABRAS DA DIRECTORA DE ONU MULLERES (Phumzile Mlambo-Ngcuka) e reflexionastes cos  DATOS QUE NOS AMOSAN A DESIGUALDADE existente aínda hoxe en día. Por último, o alumnado de Francés amosounos a súa visión ante o caso Polansky que suscitou grande polémica en Francia. 

Desde aquí, agradecerlles ás presentadoras e presentadores do acto a súa xenerosidade;  a todas e todos vós, o respecto que amosastes durante este sinxelo, pero necesario, acto para toda a comunidade educativa.

 

O ENTROIDO DE DUNKERQUE, DÉLICIEUX!

No Agra estamos de sorte. Logo dun entroido anos setenta, veu o entroido pequeno da man do club de lectura de francés cheo da cor e da folie que se pode observar no entroido de Dunkerque. Lemos as tiras de banda deseñada de Carnavaleux, Manon falounos das características desta festa: tipo de vestimena, comida típica…; degustamos as saborosas e diferentes crêpesfeitas polos propios integrantes do club. Só nos faltou levar sombreiros ou perrucas para sentirnos como na primeira fila do desfile!

ENTROIDO “ANOS 70”

Curso 1969-1970, inauguración do IES Agra do Orzán. Estamos de 50º aniversario e quixemos celebralo tamén no Entroido. Adiviñades cal foi o eixo temático?

Velaí as imaxes que desde o equipo da Biblioteca puidemos recoller. Se tedes algunha máis, mandádenola que a engadiremos a este pequeno álbum.

Parabéns aos cursos gañadores, mais sen dúbida, ese día o premio foi para toda a comunidade educativa que se volcou na celebración da festa.

O pase de diapositivas require JavaScript.

DÍA DA PAZ 2020

Acaso non hai nada mellor que compartir a paz? Esa foi a nosa sensación cando o IES Agra do Orzán se uniu á cadea humana pola paz e a diversidade entrelazada polas mans de máis de catro mil alumnos e alumnas de 20 centros de ensino da Coruña. Deixámosvos as imaxes do día e mais o manifesto escrito por Beatriz Maceda Abeleira,  coordinadora (e escritora) da biblioteca do CEIP Raquel Camacho, colexio impulsor desta iniciativa.

MANIFESTO DA PAZ 2020

Hoxe, celebramos o Día da Paz; nenos e nenas, mestres, mestras, familias, saímos dun mesmo lugar, as nosas escolas, porque como dixo Malala Yousafzai: “Un neno, unha mestra, un libro, un lapis poden cambiar o mundo”.

Nós tamén cremos que non hai mellor menciña contra as guerras, a fame, a desigualdade e a intolerancia que a educación.

Unimos as nosas mans desde o Milenium, erixido para conmemorar o século XXI, un século que queremos sexa de Paz en todo o mundo e, con elas,  fixemos unha onda que quere ser océano de ilusión, dun soño posible para todas as persoas de calquera cultura, crenza ou ideas baseadas no respecto, na igualdade e na liberdade.

Das nosas mestras e mestres esperamos que sementen en nós coñecementos que provoquen preguntas, que nos axuden a formarnos no respecto á diversidade. Dos libros esperamos, que abran portas á reflexión para, con ese lapis, escribir unha historia nova que, como este faro ilumine sendeiros de paz.

O artigo décimo da Declaración dos Dereitos da Infancia di:

O dereito para ser criado cun espírito de comprensión, tolerancia, amizade entre os pobos e irmandade universal.

Velaí o camiño cara a Paz.

Moitas grazas ás vosas mans cómplices, fortes e decididas que deixamos hoxe como a nosa persoal pegada dun mundo posible, no que tezamos unha rede de afecto e respecto feita cos fíos da paz e a igualdade.

DÍA DA PAZ 2020, MALIA TODO!

Malia termos un día chuviñoso, malia organizarmos o acto só un día antes, malia non termos a pantalla de vídeo montada, malia a existencia de voces que din: “para que celebrar a paz cando non a temos?”…,

malia todo…,

as nubes deixaron paso ás raiolas de sol reconfortantes;

malia todo…

nun día fostes quen de atopar esa camisola branca no fondo do armario e situarvos na liña de xiz que previamente axudara a pintar a rapazada do Raquel Camacho para que vós formarades o símbolo humano da paz;

malia todo…

o vicedirector non dubidou en enchufar o seu móbil aos altofalantes para que desde o fondo do patio se escoitase a canción de Antonio Flores mesturada coas vosas voces, acalando esoutras que dicían: “para que celebrar a paz…? E xunto coa pomba que o ano pasado fixerades coa profesora Milagros e que voluntariamente fostes montando, cos caligramas poéticos que fostes colgando na corticeira da entrada e mais coa pancarta que este ano creou o alumnado de 1º da ESO coa profesora Laura Velasco para lervar o vindeiro luns na Cadea humana pola paz e a nonviolencia… conseguistes transmitirnos a vosa xenerosidade, colaboración, ledicia, as vosas ganas de facer e seguir adiante. Sen dúbida, pasos esenciais para a construción da PAZ.

ASTÉRIX CHEZ IES AGRA DO ORZAN. DÉLICIEUX!

Como? Que non sabedes quen é Astérix? Preguntade na sala de profes ou na casa. De seguro que hai quen vos fale da famosa parella formada por Astérix e Obélix, os irredutibles galos.

Este mércores, o club de francés “Délicieux!” tivo a oportunidade de achegarse ao mundo de Uderzo e Goscinny da man da nosa auxiliar de conversa francesa, Manon, e do voso profesor François, quen nos contou anécdotas ben curiosas sobre estes personaxes. E como a aventura elixida foi Astérix na bretaña, Manon agasallounos cun doce típico da zona, o far breton aux pruneaux. Aquí vos deixamos a receitaco vídeo de preparación e todo para as almas cociñeiras e mais as fotos desa xornada.

OBRADOIRO DE FABRICACIÓN DE PAPEL E ENCADERNACIÓN

O alumnado de 1ºESO, participou nun obradoiro de fabricación  de papel  impartido por Manchea. Utilizarán o papel para a celebración do 8  de Marzo. 

Tamén levouse  acabo un obradoiro de encuadernación na Biblioteca, impartido tamén por Manchea . Unha das libretas feitas queda na Biblioteca para utilizala no 8 de marzo.